Yerreẓ uzaglu s tewdect,
N wid yennan : « Ala i lbaṭel ».
Tefsi tyersi s lemqes,
N wid ur as-nekni i ddel.

Azul, azul a Tunes
Agdud-inem d lefḥel.


Ẓẓur i d-yeγlin fell-am,
Yeğğa-kem i ṭṭlam,
D iseggasen kemm d imeṭṭi.
Ass-a mi d-tekker tarwa-m,
Nnuγen fell-am,
Labud ad kfunt lemḥani.
A tawwurt n Lmeγreb Ameqran,
A tigzirt n lemnam,
Σzizeḍ γer yal ilelli.



Amezruy-im ur yettrid,
Ur ntettu Sidi Buzid,
D wayen yeḍran di Tala.
Iγed n Muḥemmed Buεzizi,
Yessaγ deg yigenni,
Yezzi-d akkit i Tmazγa.
Izen yewweḍ yal ilemẓi,
Yesmekta-t-id γef tlelli,
Yerna-yas deg leḥrara.


…Imi AGDUD,
YEBΓA TUDERT,
LABUD LMEKTUB AD YINI : IH.
Ma d win ur nesεi tinzert,
Anfet-as,
Win ur yettaki, ur yetillih.



Tugdut, tugdut ay at Tunes,
Aqlaneγ nedda yid-wen.
S yis-wen i netwennes,
Abrid d kunwi i t-yessnen.
Ṭṭlam γef Lmeγreb ad yekkes,
Fell-as ad tzegg tafat-nwen.
Tallast γef Tmazγa ad tekkes,
Fell-as ad tecreq tafat i tceεlem.